डडेल्धुरामा खुल्ला ब्याडमिन्टन प्रतियोगिता: विजेताले नगद २० हजार पाउने

खेलकुद

गृहपृष्ठ
खेलकुद
डडेल्धुरामा खुल्ला ब्याडमिन्टन प्रतियोगिता: विजेताले नगद २० हजार पाउने

डडेल्धुरामा खुल्ला ब्याडमिन्टन प्रतियोगिता: विजेताले नगद २० हजार पाउने

शनिबार, भदौ २०, २०८३ चेतना खबर

डडेल्धुरा: डडेल्धुरा जिल्लामा खेलकुदको विकास, विस्तार तथा नयाँ र प्रतिभावान खेलाडी उत्पादन गर्ने उद्देश्यका साथ मैत्रीपूर्ण खुल्ला ब्याडमिन्टन प्रतियोगिता आयोजना हुने भएको छ। सुदूरपश्चिम प्रदेश खेलकुद परिषद्अन्तर्गत जिल्ला खेलकुद समिति डडेल्धुराको आयोजनामा आगामी भाद्र २७ र २८ गते प्रतियोगिता सञ्चालन हुन लागेको हो।

जिल्ला खेलकुद समितिका अध्यक्ष जगत बहादुर ऐरका अनुसार प्रतियोगिता जिल्ला खेलकुद समितिकै कभर्डहलमा सञ्चालन गरिनेछ। प्रतियोगिताको औपचारिक उद्घाटन भाद्र २७ गते बिहान ७:०० बजे तय गरिएको छ। प्रतियोगितामा सहभागी हुन इच्छुक खेलाडीहरूका लागि दर्ता शुल्क रु. १,००० तोकिएको छ भने नाम दर्ता भाद्र २६ गते दिउँसो १:०० बजेसम्म गरिसक्नुपर्नेछ। दर्ता प्रक्रिया सकिएपछि सोही दिन दिउँसो ४:३० बजे खेलको टाईसिट तयार गरी सार्वजनिक गरिने जनाइएको छ।

प्रतियोगितामा उत्कृष्ट प्रदर्शन गर्ने विजेतालाई आकर्षक पुरस्कारको व्यवस्था गरिएको छ। प्रथम स्थान हासिल गर्ने खेलाडी वा टिमले नगद रु. २०,००० सहित ट्रफी, मेडल र प्रमाणपत्र हात पार्नेछन्। यसैगरी, द्वितीय हुनेले नगद रु. १०,००० सहित ट्रफी, मेडल र प्रमाणपत्र प्राप्त गर्नेछन्।

दर्ता भएका खेलाडीहरूको आधारमा जिल्ला खेलकुद समिति आफैँले प्रतियोगिता सञ्चालनका लागि टिम गठन गर्ने जनाइएको छ।

प्रकाशित मिति: शनिबार, भदौ २०, २०८३

प्रतिक्रिया दिनुहोस्