जोरायली बासमती’को पहिचान जोगाउँदै जोरायल गाउँपालिका: आफ्नै स्टोरबाट बिक्री गर्ने तयारी

समाज

गृहपृष्ठ
समाज
जोरायली बासमती’को पहिचान जोगाउँदै जोरायल गाउँपालिका: आफ्नै स्टोरबाट बिक्री गर्ने तयारी

जोरायली बासमती’को पहिचान जोगाउँदै जोरायल गाउँपालिका: आफ्नै स्टोरबाट बिक्री गर्ने तयारी

शुक्रबार, असोज ३०, २०८३ चेतना खबर

(डोटी): डोटीको जोरायल क्षेत्रको पहिचानसँग जोडिएको स्वादिलो र सुगन्धित रैथाने ‘जोरायली बासमती’ धानको संरक्षण, प्रवर्द्धन तथा बजारीकरणमा जोरायल गाउँपालिकाले विशेष प्राथमिकता दिएको छ। स्थानीय स्तरमा उत्पादन हुने यस धानको मौलिक पहिचान जोगाउँदै बजार विस्तार गर्ने योजनाअनुसार चालु आर्थिक वर्षदेखि गाउँपालिकाका स्टोरहरूमा समेत जोरायली बासमती चामल राखेर बिक्री वितरण गर्ने प्रयास थालिएको छ।

गाउँपालिकाका अध्यक्ष दुर्गादत्त ओझाका अनुसार बासमती चामलको मौलिक पाक र गुणस्तर जोगाउन पालिकाले सचेतनामूलक कार्यक्रमहरू अघि बढाएको छ। धान राम्रोसँग पाकेपछि मात्रै काट्ने, काटेपछि १० देखि १५ दिनसम्म कुन्युमा राख्ने र त्यसपछि भकारीमा भण्डारण गर्नेजस्ता पुराना रैथाने अभ्यासले चामलको गुणस्तर उत्कृष्ट हुने भएकाले यस्ता परम्परागत विधिको संरक्षणमा जोड दिइएको छ।

विशिष्ट स्वाद र बास्नाका कारण जोरायली बासमती चामलको बजार जोरायलबाट धनगढी, महेन्द्रनगर हुँदै काठमाडौँसम्म विस्तार भएको छ। विगत आठ वर्षदेखि मिल सञ्चालन गर्दै आउनुभएका व्यवसायी भरत बोहराका अनुसार सुरुवाती समयदेखि नै चामललाई व्यवस्थित रूपमा प्याकेजिङ गरेर बिक्री वितरण गरिँदै आएकाले सहरी तथा सीमावर्ती बजारहरूमा यसको माग राम्रो रहेको छ।

रैथाने बालीको संरक्षण, प्राविधिक सुधार र व्यवस्थित बजारीकरणलाई निरन्तरता दिन सके स्थानीय उत्पादनको प्रवर्द्धन हुनुका साथै समग्र क्षेत्रको कृषि अर्थतन्त्र सुदृढ हुने अपेक्षा गरिएको छ।

प्रकाशित मिति: शुक्रबार, असोज ३०, २०८३

प्रतिक्रिया दिनुहोस्