६,५८४ मत प्राप्त गर्दै गगन थापा बने नेपाली कांग्रेसका नयाँ सभापति

राजनीति

गृहपृष्ठ
राजनीति
६,५८४ मत प्राप्त गर्दै गगन थापा बने नेपाली कांग्रेसका नयाँ सभापति

६,५८४ मत प्राप्त गर्दै गगन थापा बने नेपाली कांग्रेसका नयाँ सभापति

शनिबार, असोज २४, २०८३ चेतना खबर

नेपाली कांग्रेसको १५औँ महाधिवेशनबाट गगनकुमार थापा भारी मतान्तरसहित पार्टीको केन्द्रीय सभापति पदमा निर्वाचित हुनुभएको छ। सम्पन्न निर्वाचनमा थापाले कुल ६ हजार ५ सय ८४ मत प्राप्त गरी ऐतिहासिक जित हासिल गर्नुभएको हो भने उहाँका प्रतिस्पर्धी श्यामकृष्ण खड्गी (खड्की) ले ३ सय ७५ मत प्राप्त गर्नुभएको छ।

यस निर्वाचन परिणामलाई नेपाली कांग्रेसको आन्तरिक जीवनमा मात्र नभई समग्र नेपाली राजनीतिकै पुस्तान्तरण र रूपान्तरणको महत्त्वपूर्ण कोसेढुङ्गाका रूपमा हेरिएको छ। बदलिँदो राजनीतिक परिवेश र विशेषगरी 'जेन-जी' पुस्ताको विद्रोह तथा रूपान्तरणको भावनालाई आत्मसात् गर्दै अघि बढेको युवा जागरणले थापालाई पार्टीभित्र लगभग निर्विकल्प नेतृत्वका रूपमा स्थापित गरेको छ। राजनीतिमा नेतृत्व कसैले दिएर वा मागेर भन्दा पनि विचार, निरन्तर संघर्ष र समयको आवश्यकताले स्थापित गर्छ भन्ने मान्यतालाई यस जितले पुष्टि गरेको छ।

थापाको यो विजयसँगै लामो समयदेखि पाको पुस्ताको पकडमा रहेको पार्टी संरचनामा नयाँ ऊर्जा र दिशानिर्देश थपिएको छ। यद्यपि, ऐतिहासिक जनमत र नयाँ पुस्ताको अपेक्षालाई सम्बोधन गर्दै पार्टीभित्रको गुटबन्दी अन्त्य गर्नु, सबै पक्षलाई समेटेर पार्टी एकता जोगाउनु र आगामी राष्ट्रिय निर्वाचनमा स्पष्ट नीतिगत दृष्टिकोणसहित पार्टीलाई अघि बढाउनु नवनिर्वाचित नेतृत्वको प्रमुख कार्यभार हुनेछ।

प्रकाशित मिति: शनिबार, असोज २४, २०८३

प्रतिक्रिया दिनुहोस्