डडेल्धुरा यातायात कार्यालयका प्रमुख कार्यालयमै मदिराले लट्ठ, छड्के जाँचमा परे फन्दामा

मुख्य समाचार

गृहपृष्ठ
मुख्य समाचार
डडेल्धुरा यातायात कार्यालयका प्रमुख कार्यालयमै मदिराले लट्ठ, छड्के जाँचमा परे फन्दामा

डडेल्धुरा यातायात कार्यालयका प्रमुख कार्यालयमै मदिराले लट्ठ, छड्के जाँचमा परे फन्दामा

बिहीबार, जेठ ७, २०८३ चेतना खबर

डडेल्धुरा, ७ जेठ - सुशासन र सार्वजनिक सेवा प्रवाहको केन्द्र मानिने सरकारी कार्यालयका जिम्मेवार प्रमुख नै कार्यालय समयमा मदिराले लट्ठ भएको अवस्थामा भेटिएका छन्। यातायात व्यवस्था सेवा कार्यालय डडेल्धुराका कार्यालय प्रमुख विष्णुदत्त भट्ट बिहीबार कार्यालय समयमै अत्यधिक मदिरा सेवन गरेको अवस्थामा फेला परेका हुन्।

सेवाग्राहीहरूले कार्यालय प्रमुख भट्ट मदिरा सेवन गरी कार्यालय परिसरमा उपस्थित भएको सूचना जिल्ला प्रशासन कार्यालय डडेल्धुरालाई दिएका थिए। सोही सूचनाका आधारमा प्रशासनले छड्के जाँच गर्दा उनी दिउँसोकै समयमा मदिराले लट्ठ परेर पदीय मर्यादाविपरीतको हर्कत गरिरहेको अवस्थामा फेला परेका हुन्।

भट्ट यसअघि पनि पटक-पटक मदिरा सेवन गरेर कार्यकक्षमा हाजिर हुने तथा कार्यालय समयमै लट्ठ परेर बजार र आसपासका मदिरा पसलतिर भेटिने गरेका थिए। उनको यस्तो गैरजिम्मेवार व्यवहारले कार्यालयको सेवा प्रवाह प्रभावित हुँदै आएको स्थानीयको आरोप छ।

कार्यालयमै मापसे (मादक पदार्थ सेवन) गरेपछि उनलाई नियन्त्रणमा लिई जिल्ला प्रशासन कार्यालय डडेल्धुरा पुर्‍याइएको थियो। सार्वजनिक ओहोदामा बसेका व्यक्तिले कार्यालय समयमै मदिरा सेवन गरेको पुष्टि भएपछि उनलाई जिल्ला प्रशासन कार्यालयले कानुनी कारबाहीको दायरामा ल्याएको छ।

प्रशासनका अनुसार भट्टले आफूले गल्ती गरेको स्वीकार गरेपछी पहिलोपटकका लागि तोकिएको जरिवाना तिरेर उनी रिहा भएका छन्।

प्रकाशित मिति: बिहीबार, जेठ ७, २०८३

प्रतिक्रिया दिनुहोस्