देउवाको गृहजिल्ला डडेल्धुरामा समानान्तर अधिवेशन सुरु : जोशी वा अवस्थी सभापति बन्ने सम्भावना

राजनीति

गृहपृष्ठ
राजनीति
देउवाको गृहजिल्ला डडेल्धुरामा समानान्तर अधिवेशन सुरु : जोशी वा अवस्थी सभापति बन्ने सम्भावना

देउवाको गृहजिल्ला डडेल्धुरामा समानान्तर अधिवेशन सुरु : जोशी वा अवस्थी सभापति बन्ने सम्भावना

शनिबार, कात्तिक १४, २०८३ चेतना खबर

डडेल्धुरा — नेपाली कांग्रेसभित्र समानान्तर गतिविधि सञ्चालन गर्दै आएको देउवा समूहले पूर्वसभापति शेरबहादुर देउवाको गृहजिल्ला डडेल्धुरामा शनिबार क्षेत्रीय तथा आठौं जिल्ला अधिवेशन सुरु गरेको छ। १५औं महाधिवेशनअन्तर्गत आयोजित यस अधिवेशनबाट जिल्लाको नयाँ नेतृत्वसहित महाधिवेशन प्रतिनिधिहरू चयन हुनेछन्।

अधिवेशन सुरु हुनुअघि देउवा समूहले डडेल्धुरा बसपार्कदेखि अधिवेशनस्थल निर्माण व्यवसायी संघको सभाहलसम्म बाजागाजासहित शक्ति प्रदर्शन गर्दै र्‍याली निकालेको थियो।

जिल्लाको भावी नेतृत्वका लागि वर्तमान उपसभापतिद्वय डिल्लीराज जोशी र लक्ष्मी अवस्थी मुख्य दाबेदारका रूपमा देखिएका छन्। स्रोतका अनुसार अधिवेशनबाट जोशी वा अवस्थीमध्ये एक जना जिल्ला सभापतिमा चयन हुने प्रबल सम्भावना रहेको छ।

विशेष महाधिवेशनबाट चयन भएको केन्द्रीय कार्यसमितिले आयोजना गरेको अधिवेशनमा तत्कालीन जिल्ला सभापति भीमबहादुर साउद खुलेर लागेपछि देउवा समूहले उपसभापति जोशीलाई जिल्ला संयोजकको जिम्मेवारी दिएको थियो।

देउवा समूहले सार्वजनिक गरेको कार्यतालिकाअनुसार गत १५ असोजदेखि वडा अधिवेशन सुरु गरी १५ कात्तिकभित्र जिल्ला अधिवेशन सम्पन्न गर्ने लक्ष्य राखेको थियो। सोही तालिकाअनुसार डडेल्धुरामा शनिबार अधिवेशन आयोजना गरिएको हो।

प्रकाशित मिति: शनिबार, कात्तिक १४, २०८३

प्रतिक्रिया दिनुहोस्