डडेल्धुराका महिलाहरूलाइ सात दिने मासुको अचार बनाउने तालिम सुरु

मुख्य समाचार

गृहपृष्ठ
मुख्य समाचार
डडेल्धुराका महिलाहरूलाइ सात दिने मासुको अचार बनाउने तालिम सुरु

डडेल्धुराका महिलाहरूलाइ सात दिने मासुको अचार बनाउने तालिम सुरु

बिहीबार, जेठ ७, २०८३ चेतना खबर

डडेल्धुरा, जेष्ठ ७ । घरेलु तथा साना उद्योग कार्यालय, डडेल्धुराको आयोजनामा अमरगढी नगरपालिका–५ मा सात दिने मासुको अचार बनाउने सीप विकास तालिम सुरु भएको छ। 'सीप सिकौँ, स्वरोजगारी मार्फत आत्मनिर्भर बनौँ' भन्ने नाराका साथ स्थानीय महिलाहरूलाई व्यावसायिक रूपमा सबल बनाउने उद्देश्यले यो तालिम आयोजना गरिएको हो घरेलु तथा सना उद्योग कार्यालय डडेल्धुराका कार्यालय प्रमुख केशब सिंह भण्डारीले बताए ।

तालिमको उद्घाटन समारोह घरेलु तथा साना उद्योग कार्यालय डडेल्धुराका कार्यालय प्रमुख केशब सिंह भण्डारीको अध्यक्षतामा सम्पन्न भएको थियो। कार्यक्रमका प्रमुख अतिथि एवं नेपाल पत्रकार महासंघ डडेल्धुराका अध्यक्ष हिक्मत सिंहले सिकेको सीपलाई कोठामा मात्र सीमित नराखी बजारसम्म पुर्‍याएर आत्मनिर्भर बन्न सहभागीहरूलाई आग्रह गर्नुभयो। त्यस्तै, कार्यक्रमका अध्यक्ष भण्डारीले घरायसी र परम्परागत पेशामा रहेका स्थानीयलाई उद्यमी बनाउन कार्यालयले प्रविधि र सीप हस्तान्तरणमा सधैँ सहयोग गर्ने प्रतिबद्धता जनाउनुभयो।

नेपाली बजारमा मांसाहारी अचारको माग बढ्दै गएकाले तालिममा खसी, कुखुरा र बङ्गुर गरी तीनै प्रकारका मासुको अचार बनाउने सीपलाई प्राथमिकता दिइएको छ। ताजा मासु छिटो बिग्रने र भण्डारणको समस्या हुने हुँदा वैज्ञानिक तरिकाले अचार बनाएर यसको उपभोग्य अवधि बढाउन र बजारमा बढी नाफा कमाउन यो प्रविधि उपयोगी हुने आयोजकले जनाएको छ।

जेष्ठ ७ गतेदेखि १३ गतेसम्म चल्ने यस तालिममा सहभागीहरूलाई स्थानीय स्तरमै उपलब्ध कच्चा पदार्थ र मसलाको प्रयोग गरी गुणस्तरीय अचार बनाउने, त्यसको सुरक्षित भण्डारण गर्ने तथा आकर्षक प्याकेजिङ र बजारिकरण गर्ने तरिकाहरू प्रयोगात्मक रूपमा सिकाइनेछ। न्यून लगानीमा घरमै लघु उद्योग सुरु गर्न सघाउने यो तालिममा जिल्लाभरका १८ जना प्रशिक्षार्थीहरूको सहभागिता रहेको छ।

प्रकाशित मिति: बिहीबार, जेठ ७, २०८३

प्रतिक्रिया दिनुहोस्