डडेल्धुरामा १६ औं राष्ट्रपति रनिङ सिल्ड प्रतियोगिता सुरु, राज्यमन्त्री खड्काद्वारा उद्घाटन

खेलकुद

गृहपृष्ठ
खेलकुद
डडेल्धुरामा १६ औं राष्ट्रपति रनिङ सिल्ड प्रतियोगिता सुरु, राज्यमन्त्री खड्काद्वारा उद्घाटन

डडेल्धुरामा १६ औं राष्ट्रपति रनिङ सिल्ड प्रतियोगिता सुरु, राज्यमन्त्री खड्काद्वारा उद्घाटन

बुधबार, वैशाख ३०, २०८३ चेतना खबर

डडेल्धुरा - डडेल्धुरा मा १६ औं जिल्लास्तरीय राष्ट्रपति रनिङ सिल्ड प्रतियोगिता सुरु भएको छ। जिल्लाको अमरगढी नगरपालिका वडा नम्बर -४ टुँडिखेलको खेलमैदानमा बुधबार सुदूरपश्चिम प्रदेशकी सामाजिक विकास राज्यमन्त्री माननीय सरस्वती खड्काले एक औपचारिक समारोहका बीच प्रतियोगिताको उद्घाटन गर्नुभएको हो। उद्घाटन कार्यक्रम जिल्ला खेलकुद विकास समितिका अध्यक्ष जगत ऐरको अध्यक्षतामा शुरु भएको थियो।

प्रतियोगिताको उद्घाटन गर्दै राज्यमन्त्री खड्काले खेलकुदले मानिसलाई अनुशासित बनाउने र समाजमा छुट्टै पहिचान दिने बताउनुभयो। सो अवसरमा खेलकुदको माध्यमबाट जिल्लाको नाम राष्ट्रिय तथा अन्तर्राष्ट्रिय स्तरमा चिनाउन सफल खेलाडीहरूलाई उनीहरूको योगदानको कदर गर्दै सम्मान तथा कदर पत्र प्रदान गरिएको थियो।

यस प्रतियोगितामा डडेल्धुराका सातवटै पालिकाका विभिन्न विद्यालयबाट छानिएका छात्र तथा छात्रा खेलाडीहरूको ठूलो उपस्थिति रहेको छ। कार्यक्रममा जिल्लाका विभिन्न पालिकाका प्रमुख, उपप्रमुख, सरकारी कार्यालयका प्रमुख तथा अन्य सरोकारवालाहरूको पनि सहभागिता थियो। प्रतियोगितामा विद्यार्थीहरूले भलिबल, कवड्डी, एथलेटिक्स अन्तर्गतका विभिन्न दौडहरू, हाईजम्प, लङजम्प र मार्सल आर्ट जस्ता खेलहरूमा आफ्नो कला र क्षमता प्रदर्शन गर्ने आयोजकले बताए ।

बुधबारदेखि सुरु भएको खेल दुई दिनसम्म चल्नेछ। विद्यालय स्तरमा रहेका लुकेका प्रतिभाहरूलाई पहिचान गरी उनीहरूलाई प्रदेश र राष्ट्रिय स्तरसम्म पुर्‍याउने उद्देश्यले यो प्रतियोगिता आयोजना गरिएको हो। यहाँ उत्कृष्ट खेल प्रदर्शन गर्ने खेलाडीहरूलाई आगामी प्रदेश स्तरीय प्रतियोगिताका लागि छनोट गरिने आयोजकले जनाएको छ। खेल सुरु भएसँगै डडेल्धुराको टुँडिखेल खेल मैदान अहिले खेलाडी र खेलप्रेमीहरूको चहलपहलले निकै रमाइलो बनेको देखिन्छ ।

प्रकाशित मिति: बुधबार, वैशाख ३०, २०८३

प्रतिक्रिया दिनुहोस्