डडेल्धुरामा १६औं जिल्ला स्तरीय राष्ट्रपति रनिङ्ग शिल्ड प्रतियोगिता वैशाख ३० देखि हुने

खेलकुद

गृहपृष्ठ
खेलकुद
डडेल्धुरामा १६औं जिल्ला स्तरीय राष्ट्रपति रनिङ्ग शिल्ड प्रतियोगिता वैशाख ३० देखि हुने

डडेल्धुरामा १६औं जिल्ला स्तरीय राष्ट्रपति रनिङ्ग शिल्ड प्रतियोगिता वैशाख ३० देखि हुने

बिहीबार, वैशाख १७, २०८३ चेतना खबर

डडेल्धुरा । जिल्ला खेलकुद समिति डडेल्धुराले १६औं जिल्ला स्तरीय 'राष्ट्रपति रनिङ्ग शिल्ड' खेलकुद प्रतियोगिता आगामी वैशाख ३० र ३१ गते डडेल्धुराको टुँडिखेलस्थित खेलकुद मैदानमा सञ्चालन गर्ने भएको छ।

जिल्ला खेलकुद विकास समितिका अध्यक्ष जगत बहादुर ऎरका अनुसार प्रतियोगितामा जिल्लाका सातवटै स्थानीय तहहरू—अमरगढी र परशुराम नगरपालिका, तथा अजयमेरु, भागेश्वर, गन्यापधुरा, नवदुर्गा र आलिताल गाउँपालिकाको सहभागिता रहनेछ। स्थानीय तह स्तरीय प्रतियोगिताबाट छनौट भएर आएका खेलाडीहरूले मात्र जिल्ला स्तरीय प्रतिस्पर्धामा भाग लिन पाउनेछन्।

प्रतियोगितामा सहभागी हुनका लागि प्रत्येक पालिकाले आगामी वैशाख २२ गतेभित्र आफ्ना खेलाडीहरूको नामावली, फोटोसहितको जन्मदर्ता प्रमाणपत्रको प्रतिलिपि र खेल विधाको विवरण अनिवार्य रूपमा जिल्ला खेलकुद समितिको कार्यालयमा बुझाइसक्नुपर्नेछ। तोकिएको समयभित्र आवश्यक कागजात र खेलाडीको फाइल नबुझाउने पालिकाहरूलाई प्रतियोगितामा समावेश नगराइने समितिले स्पष्ट पारेको छ। साथै, एक पटक दर्ता भइसकेका खेलाडीको नामावलीमा प्रतियोगिता अवधिभर कुनै परिवर्तन गर्न नपाइने नियम बनाइएको छ।
उद्घाटन समारोहको मार्चपासमा सहभागी हुँदा सबै खेलाडीहरू आ-आफ्नो पालिकाको झण्डा र निर्धारित खेल पोसाकमा उपस्थित हुनुपर्नेछ। राष्ट्रपति रनिङ्ग शिल्ड प्रतियोगिता सञ्चालन निर्देशिका २०७० को पाँचौँ संशोधन बमोजिम सञ्चालन हुन लागेको यस कार्यक्रमले जिल्लाका उदीयमान खेलाडीहरूलाई आफ्नो क्षमता प्रदर्शन गर्ने महत्वपूर्ण अवसर प्रदान गर्ने अध्यक्ष ऐरले जानकारी दिनुभयो।