आलिताल गाउँपालिकामा वैशाख ८ देखि भर्ना अभियान र १५ देखि नियमित पठनपाठन सुरु हुने

समाज

गृहपृष्ठ
समाज
आलिताल गाउँपालिकामा वैशाख ८ देखि भर्ना अभियान र १५ देखि नियमित पठनपाठन सुरु हुने

आलिताल गाउँपालिकामा वैशाख ८ देखि भर्ना अभियान र १५ देखि नियमित पठनपाठन सुरु हुने

सोमबार, वैशाख ७, २०८३ चेतना खबर

डडेल्धुरा । डडेल्धुराको आलिताल गाउँपालिकाले आगामी नयाँ शैक्षिक सत्र २०८३ का लागि विद्यालय सञ्चालन सम्बन्धी निर्णय गर्दै शैक्षिक कार्यतालिका सार्वजनिक गरेको छ। गाउँ कार्यपालिकाको कार्यालय, भीमदत्तपुरले स्थानीय आवश्यकता र सरोकारवालाहरूको सुझावलाई मध्यनजर गर्दै शैक्षिक गतिविधिहरू सुचारु गर्ने निर्णय गरेको हो।

शिक्षा विकास तथा मानव स्रोत विकास केन्द्र, सानोठिमी भक्तपुरले यसअघि नै देशभरका स्थानीय तहलाई पत्राचार गर्दै वैशाख १५ गतेदेखि भर्ना अभियान र २१ गतेदेखि नियमित पठनपाठन सुरु गर्न निर्देशन दिएको थियो। तर, आलिताल गाउँपालिकाले विभिन्न सरोकारवालाहरूसँग गरेको प्रत्यक्ष तथा परोक्ष छलफलबाट प्राप्त सकारात्मक सुझावका आधारमा संघीय सरकारले तोकेको मितिभन्दा केही अगाडि नै शैक्षिक सत्र सुरु गर्ने तयारी गरेको छ।

गाउँपालिका अध्यक्ष शेर सिंह पार्कीद्वारा हस्ताक्षरित सूचना अनुसार आगामी २०८३ वैशाख ८ गतेदेखि गाउँपालिका अन्तर्गतका सम्पूर्ण विद्यालयहरूमा विद्यार्थी भर्ना अभियान सञ्चालन गरिनेछ। सोही अभियानकै क्रममा विद्यार्थीहरूलाई नयाँ पाठ्यपुस्तकहरू समेत वितरण गर्ने व्यवस्था मिलाइएको छ, ताकि पठनपाठन सुरु हुनुभन्दा अगावै विद्यार्थीको हातमा पुस्तक पुग्न सकोस्।

भर्ना र पुस्तक वितरणको कार्य सम्पन्न भएलगत्तै वैशाख १५ गतेदेखि नै विद्यालयहरूमा नियमित पठनपाठन सुचारु गर्ने निर्णय भएको छ। गाउँपालिकाले आफ्ना मातहतका सबै विद्यालयहरूलाई यसै सूचना बमोजिम तयारी गर्न र शैक्षिक कार्यतालिका कडाइका साथ कार्यान्वयन गर्न अनुरोध गरेको छ।

डडेल्धुरामा अजयमेरु र आलिताल गाउँपालिका बाहेकका अन्य स्थानीय तहहरुले भने अझै शैक्षिक क्यालेन्डर सार्वजनिक गरेका छैनन।