डडेल्धुरामा अब राहदानी आफनै घरमा

समाज

गृहपृष्ठ
समाज
डडेल्धुरामा अब राहदानी आफनै घरमा

डडेल्धुरामा अब राहदानी आफनै घरमा

शनिबार, वैशाख ५, २०८३ चेतना खबर

डडेल्धुरा — डडेल्धुरामा अब राहदानी लिन जिल्ला प्रशासन कार्यालय धाउनुपर्ने बाध्यता हट्दै गएको छ। जिल्ला प्रशासन कार्यालय डडेल्धुराले हुलाकमार्फत राहदानी घरघरमै पठाउने सेवा सुरु गरेसँगै स्थानीय नागरिकले सहजता अनुभव गर्न थालेका छन्।

परशुराम नगरपालिका–६ करालीकी निर्मला बोहरासहित सोही क्षेत्रका विक्रम बोहरा, उमेश धामी र अमरबहादुर धामीले आफ्नै घरमा राहदानी प्राप्त गरेका छन्। यसअघि भने राहदानी लिनका लागि सेवाग्राही स्वयं जिल्ला प्रशासन कार्यालय पुग्नुपर्ने हुँदा विशेषगरी दुर्गम भेगका नागरिकले दुई दिनसम्म यात्रा गर्नुपर्ने र हजारौँ रुपैयाँ खर्च गर्नुपर्ने अवस्था थियो।

प्रमुख जिल्ला अधिकारी विष्णुप्रसाद कोइरालाका अनुसार सरकारको “सेवा घरदैलोमै” भन्ने नीतिअनुसार हुलाकमार्फत राहदानी वितरण सुरु गरिएको हो। उनले प्रारम्भिक चरणमै केही राहदानी घरमै पठाइएको र आगामी दिनमा यसलाई निरन्तरता दिइने जानकारी दिए।

जिल्ला प्रशासन कार्यालयले पहिलो चरणमा २ सय ७५ जनालाई राहदानी हुलाकमार्फत पठाएको जनाएको छ। ती राहदानी सम्बन्धित व्यक्तिसम्म पुर्‍याउने काम जिल्ला हुलाक कार्यालयमार्फत भइरहेको छ।

यो सेवाले दुर्गम क्षेत्रका नागरिकलाई समय र खर्च दुबै बचत गराउने विश्वास गरिएको छ। साथै, सरकारी सेवा प्रवाहलाई अझ प्रभावकारी र पहुँचयोग्य बनाउन यो पहल महत्वपूर्ण कदमका रूपमा हेरिएको छ।

प्रकाशित मिति: शनिबार, वैशाख ५, २०८३

प्रतिक्रिया दिनुहोस्