डडेल्धुरामा पछाडि परेका महिलालाई लक्षित गर्दै ७ दिने उद्यमशीलता तालिम सुरु

समाज

गृहपृष्ठ
समाज
डडेल्धुरामा पछाडि परेका महिलालाई लक्षित गर्दै ७ दिने उद्यमशीलता तालिम सुरु

डडेल्धुरामा पछाडि परेका महिलालाई लक्षित गर्दै ७ दिने उद्यमशीलता तालिम सुरु

बिहीबार, चैत १२, २०८२ भीम दाहाल

डडेल्धुरा —डडेल्धुरामा द्वारिका देवी ठकुरानी महिला सशक्तीकरण तथा आत्मनिर्भरता अभिवृद्धि गर्ने उद्देश्यले ७ दिने उद्यमशीलता विकास तालिम सुरु भएको छ।

सुदूरपश्चिम प्रदेश सरकार पहलमा सामाजिक विकास कार्यालय डडेल्धुराको आयोजनामा सञ्चालन गरिएको उक्त तालिम बिहिवार अथवा चैत १२ गतेदेखि १८ गतेसम्म चल्नेछ। तालिम नवदुर्गा गाउँपालिका–३ स्थित वडा कार्यालयमा आयोजना गरिए सामाजिक विकास कार्यालय डडेल्धुराका कार्यालय प्रमुख मीन बहादुर लामिछानेले बताए ।

कार्यक्रमको उद्घाटन नवदुर्गा गाउँपालिका वडा नम्बर ३ का अध्यक्ष भक्त बहादुर कठायत ले गरेका थिए भने कार्यक्रमको अध्यक्षता सामाजिक विकास कार्यालयका प्रमुख मीन बहादुर लामिछाने ले गरेका थिए।

सुदूरपश्चिम प्रदेश सरकारको सहयोगमा सञ्चालन गरिएको यो कार्यक्रम सुदूरपश्चिमका सबै ९ जिल्लामा सञ्चालन भइरहेको छ। विशेषगरी पहुँच बाहिर रहेका तथा पिछडिएका महिलाहरूलाई लक्षित गर्दै उनीहरूको क्षमता विकास, नेतृत्व विकास तथा निर्णय क्षमता अभिवृद्धि गर्ने उद्देश्य राखिएको कार्यालय प्रमुख लामिछाने ले बताए।

तालिममार्फत महिलाहरूलाई सीपमूलक ज्ञान प्रदान गरी आयआर्जनमा वृद्धि गर्न, आत्मनिर्भर र सक्षम बनाउन जोड दिइएको आयोजकले जनाएको छ। यस अन्तर्गत तरकारी खेती र बाख्रापालन सम्बन्धी व्यावहारिक तालिमलाई मुख्य प्राथमिकतामा राखिएको छ।

नेपालकै प्रथम महिला मन्त्री द्वारिका देवी ठकुरानी ले झण्डै ७५ वर्षअघि महिला सशक्तीकरणका क्षेत्रमा खेलेको ऐतिहासिक भूमिका स्मरण गर्दै उनकै नामबाट र सोही प्रेरणाबाट कार्यक्रम सञ्चालन गरिएको जनाइएको छ।

स्थानीय स्तरमै महिलाहरूलाई सीप र अवसर प्रदान गर्दै आर्थिक रूपमा सबल बनाउने उद्देश्यले सुरु गरिएको यस्तो तालिमले दीर्घकालीन रूपमा समाज रूपान्तरणमा महत्वपूर्ण योगदान पुर्‍याउने विश्वास गरिएको छ।

प्रकाशित मिति: बिहीबार, चैत १२, २०८२

प्रतिक्रिया दिनुहोस्