डडेल्धुरामा कृषि हाट बजार पुनः सञ्चालन, किसान र उपभोक्तालाई राहत हुने अपेक्षा

समाज

गृहपृष्ठ
समाज
डडेल्धुरामा कृषि हाट बजार पुनः सञ्चालन, किसान र उपभोक्तालाई राहत हुने अपेक्षा

डडेल्धुरामा कृषि हाट बजार पुनः सञ्चालन, किसान र उपभोक्तालाई राहत हुने अपेक्षा

बुधबार, चैत ४, २०८२ चेतना खबर

डडेल्धुरा - डडेल्धुरामा कृषि उपजलाई व्यवस्थित रूपमा बिक्री–वितरण गर्न तथा उपभोक्तालाई सहज पहुँच दिन कृषि थोक तथा हाट बजार सञ्चालन गर्ने निर्णय गरिएको छ।

जिल्लास्थित सरोकारवाला निकायहरूबीच भएको सर्वपक्षीय छलफलपछि २०८२ साल चैत १४ गते शनिबारदेखि निर्माण व्यवसायी संघको भवन अगाडि, रानीधारातर्फको जग्गामा हाट बजार सञ्चालन गर्ने तयारी गरिएको हो।

हाट बजार सञ्चालनका लागि अमरगढी नगरपालिका–५ का वडा अध्यक्ष टंक बहादुर क्षेत्रीको अध्यक्षतामा १९ सदस्यीय समिति गठन गरिएको छ।

यसैगरी बजारको अनुगमन र समन्वयका लागि जिल्ला समन्वय समितिका प्रमुख गगन सिंह भण्डारीको संयोजकत्वमा ३ सदस्यीय अनुगमन समिति गठन गरिएको छ, जसमा अमरगढी नगरपालिकाका प्रमुख र प्रमुख जिल्ला अधिकारी सदस्य रहेका छन ।

हाट बजार सञ्चालनसम्बन्धी अन्तरक्रिया कार्यक्रममा सहभागीहरूले कृषि उत्पादनको पहिचान र बजार सुनिश्चितताका लागि यस्तो बजार अत्यन्त आवश्यक रहेको बताएका छन्। उनीहरूले बजारलाई व्यवस्थित र दिगो बनाउन सबै सरोकारवाला, कृषक, व्यवसायी र उपभोक्ता जिम्मेवार बन्नुपर्नेमा जोड दिएका छन्।

यसअघि २०६५ सालमा पनि सदरमुकाममा हाट बजार सञ्चालन गरिएको भए पनि दीर्घकालीन रूपमा सफल हुन सकेको थिएन। तर अहिले पनि कृषकले उचित मूल्य नपाउने र उपभोक्ताले महँगोमा तरकारी किन्नुपर्ने तथा बिचौलियाबाट महंगोमा पर्ने समस्या कायमै रहेको छ।

प्रकाशित मिति: बुधबार, चैत ४, २०८२

प्रतिक्रिया दिनुहोस्