डडेल्धुरामा निर्वाचन कार्यालय र सञ्चारकर्मीबीच निर्वाचन लक्षित छलफल सम्पन्न

राजनीति

गृहपृष्ठ
राजनीति
डडेल्धुरामा निर्वाचन कार्यालय र सञ्चारकर्मीबीच निर्वाचन लक्षित छलफल सम्पन्न

डडेल्धुरामा निर्वाचन कार्यालय र सञ्चारकर्मीबीच निर्वाचन लक्षित छलफल सम्पन्न

बुधबार, फागुन १३, २०८२ चेतना खबर

डडेल्धुरामा आसन्न प्रतिनिधिसभा सदस्य निर्वाचन २०८२ लाई मध्यनजर गर्दै जिल्ला निर्वाचन कार्यालय डडेल्धुराले जिल्लामा क्रियाशील सञ्चारकर्मीहरूसँग निर्वाचनसम्बन्धी गतिविधि, तयारी र प्रक्रियाबारे अन्तरक्रिया तथा छलफल कार्यक्रम सम्पन्न गरेको छ।

आगामी फागुन २१ गते हुने निर्वाचनको तयारीबारे जानकारी दिने उद्देश्यले आयोजना गरिएको कार्यक्रममा जिल्ला निर्वाचन अधिकारी करुणाकर अवस्थीले निर्वाचन आयोगले देशव्यापी रूपमा तथा जिल्ला निर्वाचन कार्यालय डडेल्धुराले जिल्लास्तरमा गरेका तयारीबारे जानकारी गराउनुभएको थियो। उहाँका अनुसार पतपेटिका र मतपत्रलगायत निर्वाचन सामग्री जिल्लामा आइसकेका छन्।

कार्यक्रममा स्वतन्त्र, निष्पक्ष र विश्वसनीय निर्वाचनका अन्तर्राष्ट्रिय मान्यताहरू पालना गर्दै निर्वाचन सम्पन्न गरिने प्रतिबद्धता व्यक्त गरिएको थियो। साथै आलिताल गाउँपालिकामा मतदाता नामावली समेट्ने क्रममा धेरै मतदाता छुटेको गुनासो आएको विषयमा पनि छलफल भएको थियो। जिल्लामा हाल १ हजार ६८० अस्थायी मतदाता रहेको जानकारी दिइयो। निर्वाचन आयोगका अनुसार यसपटक देशभर करिब ९ लाख नयाँ मतदाता थपिएका छन्।

जिल्ला निर्वाचन अधिकारी अवस्थीले प्रतिनिधिसभा सदस्य निर्वाचन २०८२ सम्पन्न गर्न सुरक्षाकर्मीबाहेक अन्य कर्मचारी तथा स्वयंसेवक गरी करिब १ हजार २०० जना जनशक्ति परिचालन गरिने बताउनुभयो। यस निर्वाचनका लागि डडेल्धुरामा जम्मा १०४ मतदानस्थल र १४२ मतदान केन्द्र रहनेछन्।

मतदाता विवरणअनुसार जिल्लाभर ४६ हजार ४ सय ४६ महिला र ४६ हजार ९ सय ५७ पुरुष गरी जम्मा ९३ हजार ४ सय ३ मतदाता रहेका छन्। कार्यक्रममार्फत निर्वाचनसम्बन्धी भ्रम चिर्न, तथ्यमा आधारित सूचना प्रवाह गर्न र सञ्चारकर्मीको भूमिकालाई अझ प्रभावकारी बनाउने उद्देश्य लिइएको आयोजकले जनाएका छन्।

प्रकाशित मिति: बुधबार, फागुन १३, २०८२

प्रतिक्रिया दिनुहोस्