अमरगढी–६ का नागरिक असन्तोषमा नेकपा डडेल्धुराको संवादमा जोड

समाज

गृहपृष्ठ
समाज
अमरगढी–६ का नागरिक असन्तोषमा नेकपा डडेल्धुराको संवादमा जोड

अमरगढी–६ का नागरिक असन्तोषमा नेकपा डडेल्धुराको संवादमा जोड

मंगलबार, फागुन १२, २०८२ चेतना खबर

डडेल्धुरा: डडेल्धुराको अमरगढी नगरपालिका–६ मा फोहरमैला व्यवस्थापनका लागि स्थानीय नागरिकको पर्याप्त जानकारी, परामर्श र सहमति बिना जमिन खरिद प्रक्रिया अगाडि बढाइएको भन्दै नेपाली कम्युनिष्ट पार्टी (नेकपा) डडेल्धुराले गम्भीर ध्यानाकर्षण गराएको छ।

पार्टीका केन्द्रिय सदस्य उमेश प्रसाद भट्टले हस्ताक्षर गरि जारी गरेको प्रेस वक्तव्यमा हाल देश लोकतन्त्रको महत्वपूर्ण अभ्यास निर्वाचनमा होमिएको अवस्थामा नागरिकको संवैधानिक अधिकार र जिम्मेवारीको सम्मान हुनुपर्नेमा जोड दिइएको छ। तर अमरगढी–६ मा फोहरमैला व्यवस्थापनको नाममा स्थानीयको जानकारी र सहमति बिना प्रक्रिया अघि बढाइएको विषयले नागरिकमा असन्तोष बढेको नेकपाको ठहर छ।

वक्तव्यमा सो विषयमा असन्तुष्टि जनाउँदै स्थानीयस्तरमै निर्वाचन बहिष्कार गर्ने निर्णय भएको खबरले लोकतान्त्रिक प्रक्रियामै नकारात्मक असर पर्न सक्ने अवस्था सिर्जना भएको उल्लेख गरिएको छ। यसप्रति पार्टीले चिन्ता व्यक्त गर्दै समस्या समाधानका लागि संवाद नै उपयुक्त माध्यम भएको स्पष्ट पारेको छ।

नेकपाले सम्बन्धित नगरपालिका, सरोकारवाला निकाय, राजनीतिक दल, नागरिक समाज तथा सरोकारवाला सबै पक्षबीच तत्काल बहुपक्षीय बैठक तथा छलफल आयोजना गरी सहमति र न्यायोचित समाधान खोज्न माग गरेको छ। साथै अमरगढी–६ का सम्पूर्ण स्थानीय जनसमुदायलाई लोकतन्त्रको सुदृढीकरणका लागि निर्वाचनमा सक्रिय सहभागिता जनाउन हार्दिक अपिल पनि गरेको छ।

प्रेस वक्तव्यमा नेकपाले सधैं जनताको अधिकार, सहभागिता र न्यायपूर्ण समाधानको पक्षमा दृढतापूर्वक उभिने प्रतिबद्धता दोहोर्‍याएको छ।