डडेल्धुरामा एमालेका प्रदेश कमिटी सदस्य सहितका नेताकार्यकर्ताहरु नेकपामा प्रवेश

राजनीति

गृहपृष्ठ
राजनीति
डडेल्धुरामा एमालेका प्रदेश कमिटी सदस्य सहितका नेताकार्यकर्ताहरु नेकपामा प्रवेश

डडेल्धुरामा एमालेका प्रदेश कमिटी सदस्य सहितका नेताकार्यकर्ताहरु नेकपामा प्रवेश

मंगलबार, फागुन ५, २०८२ चेतना खबर

डडेल्धुरा — नेकपा एमाले सुदूरपश्चिम प्रदेश कमिटी निवर्तमान सदस्य तथा डडेल्धुरा जिल्लाका बौद्धिक तथा स्थापित नेता शिवराम ताम्राकार सहित नेकपा एमाले डडेल्धुरा जिल्ला कमिटीका सदस्यहरू अरुण शाहीलगायत नेताकार्यकर्ताहरूले नेकपा एमाले परित्याग गरी नेपाली कम्युनिस्ट पार्टी (नेकपा) मा प्रवेश गरेका छन्।

मंगलबार पार्टी प्रवेशका लागि आयोजित कार्यक्रममा नेकपाका नेता तथा सुदूरपश्चिम प्रदेश संसदीय दलका नेता खगराज भट्ट लगायत नेताहरूले नवप्रवेशीहरूलाई पार्टीमा स्वागत गरेका हुन्।

२०५४ सालदेखि एमाले राजनीतिमा निरन्तर सक्रिय रहेका नेता ताम्राकारले पछिल्लो समय एमाले नेतृत्वमा देखिएको अहंकार, पार्टीभित्रको अपमानजनक व्यवहार तथा कार्यकर्ताप्रतिको उपेक्षा सहन नसकेर नेकपामा आवद्ध भएको बताए। उनले नेकपा अहिले कम्युनिस्टहरूको ध्रुवीकरणको उचित गन्तव्य बनेको उल्लेख गर्दै आफूजस्तै कम्युनिस्ट विचार बोकेका इमानदार नेताकार्यकर्ताहरू क्रमशः यहीँ धारमा समाहित हुँदै जाने विश्वास व्यक्त गरे।

पार्टी प्रवेश कार्यक्रममा बोल्दै नेता खगराज भट्टले शिवराम ताम्राकारजस्ता इमानदार र अनुभवी नेताकार्यकर्ताको प्रवेशले डडेल्धुराको कम्युनिस्ट आन्दोलन थप सुदृढ बनेको जिकिर गरे। उनले यसले जिल्लामा नेकपाको संगठनात्मक शक्ति बढ्नुका साथै जनआधार विस्तारमा महत्वपूर्ण योगदान पुग्ने विश्वास व्यक्त गरे।