आलितालमा राजनीतिक असहमतिको सिकार बने विद्यार्थी,अध्यक्ष पार्कीद्वारा कारबाहीको चेतावनी

खेलकुद

गृहपृष्ठ
खेलकुद
आलितालमा राजनीतिक असहमतिको सिकार बने विद्यार्थी,अध्यक्ष पार्कीद्वारा कारबाहीको चेतावनी

आलितालमा राजनीतिक असहमतिको सिकार बने विद्यार्थी,अध्यक्ष पार्कीद्वारा कारबाहीको चेतावनी

शुक्रबार, पुस २५, २०८२ चेतना खबर

डडेल्धुरा: आलिताल गाउँपालिका वडा नम्बर २ का वडाध्यक्ष प्रमोद मल्लको निर्णयका कारण वडाका विद्यार्थी राष्ट्रपति रनिङ सिल्ड प्रतियोगिता खेल्नबाट वञ्चित भएपछि उक्त विषय विवादित बनेको हो।

शुक्रबार शिल्डको उदघाटन गर्दै गाउँ पालिका अध्यक्ष शेर सिंह पार्कीले विद्यार्थीको नैसर्गिक अधिकारमाथिको गम्भीर खेलबाड भएको भन्दै सम्बन्धित विद्यालयका प्रधानाध्यापकलाई कानुनी कारबाहीको दायरामा ल्याइने बताएका छन्।

अध्यक्ष पार्कीका अनुसार केही दिनअघि वडा नम्बर २ का वडाध्यक्ष मल्लले आफ्ना वडाका विद्यार्थीलाई राष्ट्रपति रनिङ सिल्डमा सहभागी नगराउने सार्वजनिक रुपमै अभिव्यक्ति दिएका थिए।

वडाको एकमात्र माध्यमिक विद्यालय उणिकोट माध्यमिक विद्यालयलाई यसपटक पालिकास्तरीय राष्ट्रपति रनिङ सिल्ड प्रतियोगितामा सहभागी गराइएको छैन।

शुक्रबारदेखि सुरु भएको आलिताल गाउँपालिकास्तरीय राष्ट्रपति रनिङ सिल्ड प्रतियोगितामा वडा नम्बर २ का विद्यार्थी अनुपस्थित हुनु दुःखद भएको अध्यक्ष पार्कीले बताए। “सनकको भरमा विद्यार्थीहरूको भविष्यसँग खेलबाड हुनु अत्यन्तै आपत्तिजनक हो,” उनले भने।

अध्यक्ष पार्कीका अनुसार गाउँपालिकाले प्रतियोगितामा सहभागी हुन विद्यालयका प्रधानाध्यापकलाई औपचारिक पत्र पठाइसकेको थियो। तर स्थानीय सरकारको निर्णय अवज्ञा गर्दै विद्यालय र विद्यार्थीहरुलाई सहभागी नगराइएको भन्दै प्रधानाध्यापकविरुद्ध आवश्यक कारबाही गरिने उनले स्पष्ट पारे।
वडाध्यक्ष मल्लले केही दिनअघि आलिताल गाउँकार्यपालिका बैठकमा नगरप्रहरी राख्ने विषयमा असहमति जनाउँदै आफ्ना वडाको विद्यालय र विद्यार्थीहरु राष्ट्रपति रनिङ सिल्डमा सहभागिता नहुने बताएका थिए।

उणिकोट माध्यमिक विद्यालयको विद्यालय व्यवस्थापन समितिको अध्यक्ष समेत वडाध्यक्ष मल्ल स्वयं हुन्।
“स्थानीय सरकारको निर्णय नमान्ने कस्तो विद्यालय हो?” भन्दै अध्यक्ष पार्कीले कडा चेतावनीसमेत दिएका छन्। उनले आगामी दिनमा विद्यार्थीको हक अधिकार कुण्ठित हुने कुनै पनि कार्य सह्य नहुने पनि स्पष्ट पारे।

आलिताल गाउँपालिकाकी उपाध्यक्ष मैना कुमारी रावलले आफनो राजनीतिक स्वार्थ र महत्वकांक्षाका कारण विद्यार्थीहरुको नैसर्गिक अधिकारमाथी जिम्मेवार जनप्रतिनिधिबाट कुण्ठित गराउनु गैह्रजिम्मेवारीपन भएको बताइन।

वडाअध्यक्ष प्रमोद मल्ल्ले गाउँपालिकामा रहेका खेल प्रशिक्षकहरु आफनो विद्यालयमा पाइला समेत नटेक्ने र पालिकाबाट तलबभत्ता मात्र खाने प्रवृत्तिको बारम्बार पालिकाको ध्यानाकर्षण गराउँदा समेत सुनुवाइ नभएपछी दवाव स्वरुप राष्ट्रपति रनिङ शिल्ड बहिस्कार गरेको दाबी गरे ।

शुक्रबार देखि सञ्चालन भएको पालिकास्तरिय राष्ट्रपति रनिङ शिल्ड 3 दिन चल्नेछ।

प्रकाशित मिति: शुक्रबार, पुस २५, २०८२

प्रतिक्रिया दिनुहोस्