डडेल्धुरा - सुदूरपश्चिम प्रदेशमा सवारी दुर्घटनाको संख्या पछिल्ला वर्षहरूमा डरलाग्दो गरी बढेको छ। ट्राफिक व्यवस्थापन कार्यालय अत्तरियाको तथ्यांकअनुसार, चालु आर्थिक वर्ष २०८१-८२ मा सवारी दुर्घटनाको संख्यामा अस्वाभाविक वृद्धि देखिएको छ, जसले जनजीवनमा गम्भीर असर पारेको छ।
कार्यालयको तथ्यांकले देखाएअनुसार, आर्थिक वर्ष २०७९-८० मा २५२ र २०८०-८१ मा ३०९ सवारी दुर्घटना भएका थिए। तर, चालु आर्थिक वर्ष २०८१-८२ मा यो संख्या एकाएक बढेर १,१५३ पुगेको छ, जुन अघिल्ला वर्षहरूको तुलनामा निकै धेरै हो।
दुर्घटनासँगै मृत्यु र घाइते हुनेको संख्या पनि ह्वात्तै बढेको छ। आर्थिक वर्ष २०७९-८० मा १७७ जनाको मृत्यु र ४७३ जना घाइते भएका थिए भने २०८०-८१ मा १७२ जनाको मृत्यु र ५३६ जना घाइते भएका थिए। तर, २०८१-८२ मा मृतकको संख्या १८५ पुगेको छ भने १,९३६ जना घाइते भएका छन्। यो तथ्यांकले प्रदेशमा सडक सुरक्षाको अवस्था चिन्ताजनक रहेको स्पष्ट पार्छ।
अधिकांश दुर्घटनाहरू मोटरसाइकल र स्कुटीजस्ता दुईपांग्रे सवारीसाधनसँग सम्बन्धित छन्। विशेषगरी तराईका जिल्लाहरू कैलाली र कञ्चनपुरमा दुर्घटनाको संख्या उच्च रहेको कार्यालयले जनाएको छ। सडक प्रयोगकर्ताहरूमा ट्राफिक नियम पालनाको कमी, तीव्र गति, र सडकको अवस्था पनि दुर्घटना बढ्नुका प्रमुख कारणहरू भएको प्रहरीले जनाएको छ।
