डडेल्धुराको मुख्य बजार क्षेत्रको ट्राफिक व्यवस्थापनका लागि कडा नियम, दिउँसो लोड–अनलोडमा रोक

समाज

गृहपृष्ठ
समाज
डडेल्धुराको मुख्य बजार क्षेत्रको ट्राफिक व्यवस्थापनका लागि कडा नियम, दिउँसो लोड–अनलोडमा रोक

डडेल्धुराको मुख्य बजार क्षेत्रको ट्राफिक व्यवस्थापनका लागि कडा नियम, दिउँसो लोड–अनलोडमा रोक

मंगलबार, असोज १३, २०८३ चेतना खबर

डडेल्धुरा - बागबजार र बगरकोट सडक क्षेत्रमा हुने सवारी आवागमनको अवरोध हटाउन सरोकारवालाहरूको बैठकले विभिन्न महत्वपूर्ण निर्णयहरू गरेको छ। सडकमा देखिने जाम न्यूनीकरण गर्दै आवागमनलाई सहज तथा व्यवस्थित बनाउने उद्देश्यले नयाँ पार्किङ नियम तथा ट्राफिक मापदण्ड लागू गर्ने सहमति भएको हो।

निर्णय अनुसार भागेश्वर गाउँपालिकामा सञ्चालन हुने सवारी साधनहरूलाई बगरकोट सडक खण्डको चिरञ्जीवी अस्पताल साइडको एकातर्फ मात्र पार्किङ गर्न दिइनेछ भने अन्य पालिकामा चल्ने सवारीलाई बसपार्क लगायतका उपयुक्त स्थानमा पार्किङको व्यवस्था मिलाइनेछ। यसैगरी भीडभाड नियन्त्रण गर्न बगरकोट सडक, बागबजार र तुफानडाँडा बजार क्षेत्रमा दिउँसो ०१:०० बजेदेखि ०३:०० बजेसम्म मालवाहक सवारी साधनको लोड तथा अनलोड कार्य गर्न रोक लगाइएको छ। साथै, तुफानडाँडादेखि बगरकोट चोकसम्म सडक बाटोमा राखिएका सम्पूर्ण निर्माण सामग्री तथा उपकरणहरूलाई तत्काल हटाउने निर्णय गरिएको छ।

बजार क्षेत्रको पार्किङलाई व्यवस्थित बनाउन घरतर्फको पहिलो लेनमा मोटरसाइकल र त्यसपछिको अर्को लेनमा कार तथा अटो रिक्सा राख्ने व्यवस्था मिलाइनेछ भने सडकको बीच भागमा पार्किङ गर्न पूर्ण रूपमा निषेध गरिएको छ। ट्राफिक व्यवस्थापनलाई प्रभावकारी बनाउन आवश्यक पर्ने साइन पोस्ट र रोड डिभाइडरहरू सडक डिभिजन डोटी र अमरगढी नगरपालिकाले उपलब्ध गराउनेछन् भने ट्राफिक व्यवस्थापनमा सहयोगका लागि बजार क्षेत्रमा २ जना नगर प्रहरी खटाउन अमरगढी नगरपालिकालाई तत्काल पत्राचार गरिने भएको छ।

सवारी नियम उल्लंघन गर्नेहरूमाथि कडाइ गर्दै अत्यधिक गति, मापसे, लापसे, गलत ठाउँमा पार्किङ गर्ने तथा बैठकका निर्णयहरूको अवज्ञा गर्ने चालकहरूलाई नियमानुसार कारबाही गरिनेछ। यसका साथै राजमार्गलाई अवरोधरहित रूपमा सञ्चालन गर्न कार्ययोजना र रोष्टर पारित गरी कार्यान्वयनमा लैजाने निर्णय समेत भएको छ।

प्रकाशित मिति: मंगलबार, असोज १३, २०८३

प्रतिक्रिया दिनुहोस्