डडेल्धुराका कलिला विद्यार्थीले खाजा खर्चबाट गरे बाढीपीडितलाई सहयोग

समाज

गृहपृष्ठ
समाज
डडेल्धुराका कलिला विद्यार्थीले खाजा खर्चबाट गरे बाढीपीडितलाई सहयोग

डडेल्धुराका कलिला विद्यार्थीले खाजा खर्चबाट गरे बाढीपीडितलाई सहयोग

सोमबार, भदौ १५, २०८३ चेतना खबर

डडेल्धुरा — संकटको समयमा देखाएको सानो सहयोगले पनि ठूलो मानवीय सन्देश दिन सक्छ भन्ने उदाहरण डडेल्धुराका विद्यालयस्तरका बालबालिकाले प्रस्तुत गरेका छन्। जिल्लाको परशुराम नगरपालिका–३, सिमल्टास्थित जनज्योति प्राथमिक विद्यालयका विद्यार्थीहरूले रसुवाका बाढीपीडित नागरिकको सहयोगार्थ आफ्नो खाजा खर्च कटाएर आर्थिक सहयोग गरेका हुन्।

विद्यालयका कलिला विद्यार्थीहरूले दैनिक खाजाका लागि पाएको रकमबाट बचाएर संकलन गरेको रु. १ हजार ६ सय १२ रुपैयाँ प्रधानमन्त्री दैवी प्रकोप उद्धार कोषमा जम्मा गरेका छन्। बालबालिकाले आफ्नै पहलमा रकम संकलन गरी विपद्‌मा परेकाहरूको राहतका लागि पठाएका हुन्।

आर्थिक हिसाबले यो रकम सानो देखिए पनि सानो उमेरका बालबालिकाले देखाएको मानवीय संवेदना, सहयोगी भावना र सामाजिक जिम्मेवारीबोध निकै प्रशंसनीय एवं अनुकरणीय रहेको छ। अरूको पीडालाई आफ्नै सम्झेर प्राथमिक तहका विद्यार्थीहरूले गरेको यस कार्यले समाजमा सकारात्मक सन्देश प्रवाह गर्नुका साथै परोपकारी भावनाको महत्त्वलाई उजागर गरेको छ।