असारे विकास'को अर्को नमुना: दुई महिना नपुग्दै भीमदत्त राजमार्गको कालोपत्रे पखालियो

मुख्य समाचार

गृहपृष्ठ
मुख्य समाचार
असारे विकास'को अर्को नमुना: दुई महिना नपुग्दै भीमदत्त राजमार्गको कालोपत्रे पखालियो

असारे विकास'को अर्को नमुना: दुई महिना नपुग्दै भीमदत्त राजमार्गको कालोपत्रे पखालियो

बुधबार, साउन २७, २०८३ चेतना खबर

डडेल्धुरा - सुदूरपश्चिम प्रदेशका सात पहाडी जिल्लालाई जोड्ने मुख्य जीवनरेखा मानिने भिमदत्त राजमार्ग मर्मत सम्भारको केही समयमै पुनः जीर्ण बनेको छ। करिब ५ करोड रुपैयाँको लागतमा मर्मत गरिएको राजमार्गको गैरा-हागुल्डे साहुखर्क खण्डमा प्रिमिक्स प्रविधिबाट कालोपत्रे गरिएको दुई महिना नपुग्दै सडक उप्किएर पहिले अवस्थामा पुगेपछी सवारीचालकहरू समस्यामा परेका छन्।

धनगढीस्थित उच्चकोटी चन्द्र विकास जेभी निर्माण कम्पनीले गत जेठ महिनामा मात्रै उक्त खण्डको मर्मत कार्य सम्पन्न गरेको थियो। तर, गुणस्तरहीन काम र सरकारी निकायको बेवास्ताका कारण असार-साउनको वर्षा सुरु भएसँगै सडकका विभिन्न स्थानमा ठूला-ठूला खाल्टाखुल्टी पर्नुका साथै बीचमै सडक भासिन पुगेको छ। जनताको करबाट उठेको राजस्वको दुरुपयोग भएको भन्दै रुष्ट बनेका स्थानीयहरूले निर्माण कम्पनीको लापर्बाही र सडक डिभिजन कार्यालयको फितलो अनुगमनमाथि प्रश्न उठाएका छन्।

सडकको दुरावस्थाका कारण उक्त राजमार्गमा दैनिक यात्रा गर्ने सयौँ सवारी साधन र यात्रुहरूले सास्ती व्यहोर्नु परेको छ। सडक हिलाम्मे र खाल्टाखुल्टीयुक्त हुँदा दुर्घटनाको जोखिम उच्च बनेको चालकहरूको गुनासो छ। यता सडक डिभिजन कार्यालय कुलपाते, डोटीले निर्माण कम्पनीलाई पुनः कालोपत्रेका लागि पत्राचार गरिएको जनाए पनि निरन्तरको वर्षाका कारण तत्काल काम गर्न सम्भव नभएको बताएको छ।

सडक मर्मतका नाममा वर्षेनी करोडौँ रकम खर्च हुने गरेको भएपनि सडक दिगो नहुने परिपाटीले भिमदत्त राजमार्गको यात्रा सधैँ जोखिमपूर्ण बन्दै गएको छ।

प्रकाशित मिति: बुधबार, साउन २७, २०८३

प्रतिक्रिया दिनुहोस्