अजयमेरुको एकीकृत स्वास्थ्य शिविर: एकै दिनमा २०० जनाले लिए सेवा

स्वास्थ्य

गृहपृष्ठ
स्वास्थ्य
अजयमेरुको एकीकृत स्वास्थ्य शिविर: एकै दिनमा २०० जनाले लिए सेवा

अजयमेरुको एकीकृत स्वास्थ्य शिविर: एकै दिनमा २०० जनाले लिए सेवा

बुधबार, वैशाख १६, २०८३ चेतना खबर

डडेल्धुरा - अजयमेरु गाउँपालिकाको आयोजनामा आज वडा नं. ६ मा एक दिने एकीकृत स्वास्थ्य शिविर सम्पन्न भएको छ। ग्रामीण क्षेत्रका नागरिकहरूलाई घरदैलोमै विशेषज्ञ स्वास्थ्य सेवा पुर्‍याउने पालिकाको वार्षिक लक्ष्य अनुसार आयोजना गरिएको उक्त शिविरमा स्थानीय बासिन्दाहरूको उत्साहजनक सहभागिता रहेको थियो।

गाउँपालिका अन्तर्गत स्वास्थ्य शाखाका अनुसार शिविरमा जम्मा २०० जना सेवाग्राहीहरूले विभिन्न रोगको निःशुल्क परीक्षण तथा उपचार सेवा प्राप्त गरेका छन्।

शिविरमा सबैभन्दा धेरै चाप जनरल चेकजाँच तथा ओपिडी सेवामा देखिएको थियो, जहाँ १२९ जनाले स्वास्थ्य परामर्श लिएका थिए। पछिल्लो समय ग्रामीण भेगमा आँखाको समस्या बढ्दै गएको अवस्थालाई मध्यनजर गर्दै सञ्चालन गरिएको निःशुल्क आँखा जाँच सेवाबाट १०८ जना लाभान्वित भएका छन्। सो क्रममा ३२ जनालाई तत्कालै निःशुल्क चश्मा वितरण गरिएको थियो भने आँखाको शल्यक्रिया गर्नुपर्ने जटिल अवस्थाका २२ जना बिरामीहरूलाई थप उपचारका लागि पहिचान गरिएको छ। महिलाहरूको स्वास्थ्यलाई विशेष ध्यान दिँदै सञ्चालन गरिएको भीआईए स्क्रिनिङ सेवामा ३८ जना महिलाले पाठेघरको मुखको क्यान्सरको प्रारम्भिक जाँच गराएका थिए।

प्राविधिक तर्फ २५ जनाको भिडियो एक्सरे, ४ जनाको इसिजी र १३ जनाको प्रयोगशालामा रगत परीक्षण गरिएको थियो। त्यस्तै ३१ जनाले दाँतको उपचार गराएका थिए भने ६० जनाले आयुर्वेदिक पद्धतिबाट स्वास्थ्य सेवा लिएका थिए। उपचारका क्रममा आवश्यक देखिएका १५८ जना बिरामीहरूलाई गाउँपालिकाले निःशुल्क औषधि समेत उपलब्ध गराएको थियो।

वडा नं. ६ मा सम्पन्न भएको उक्त शिविर भोलि वैशाख १७ गते वडा नं. ५ स्थित देवल स्वास्थ्य चौकीमा सञ्चालन हुने गाउँपालिकाले जनाएको छ।

प्रकाशित मिति: बुधबार, वैशाख १६, २०८३

प्रतिक्रिया दिनुहोस्