डोटीको गैरा बजारमा ट्रयाक्टर दुर्घटना, बालिकासहित ९ जना घाइते

समाज

गृहपृष्ठ
समाज
डोटीको गैरा बजारमा ट्रयाक्टर दुर्घटना, बालिकासहित ९ जना घाइते

डोटीको गैरा बजारमा ट्रयाक्टर दुर्घटना, बालिकासहित ९ जना घाइते

मंगलबार, असोज २०, २०८३ चेतना खबर

डोटी-डडेल्धुराको सिमानामा पर्ने डोटीको जोरायल गाउँपालिका–१ गैरा बजार नजिकै कामदार बोकेको ट्रयाक्टर सडकबाट १२० मिटर तल खस्दा ३ वर्षीया बालिकासहित ९ जना घाइते भएका छन्। बिहान ८ः४५ बजे गैरा बजारबाट कामदार लिएर मेलखर्कतर्फ जाँदै गरेको सु.प.प्र.०१००२ त ४९१० नम्बरको ट्रयाक्टर अनियन्त्रित भई भीमदत्त राजमार्गबाट सिधै भीरमा खसेर दुर्घटनाग्रस्त भएको हो। डडेल्धुराको भागेश्वर गाउँपालिका–५ निवासी २३ वर्षीय चालक प्रकाशबहादुर थापा मगरले चलाएको उक्त सवारी अनियन्त्रित भई भीरमा बजारिँदा सवार यात्रुहरू गम्भीर घाइते भएका हुन्।

दुर्घटनाको सूचना प्राप्त हुनासाथ प्रहरी चौकी घण्टेश्वरबाट प्रहरी सहायक निरीक्षक लोकेन्द्रसिंह ठगुन्नाको नेतृत्वमा ट्राफिकसहितको सुरक्षा टोली घटनास्थल पुगेको थियो। प्रहरी र स्थानीयको सक्रियतामा भीरबाट उद्धार गरिएका घाइतेहरूमा जोरायल–१ चपरचानीका ३३ वर्षीय अमर सिजाली मगर, ४६ वर्षीय डम्बर थापा, १८ वर्षीय भरत थापा मगर, १८ वर्षीय विवस थापा मगर र ३५ वर्षीय हर्कबहादुर थापा मगर रहेका छन्। त्यस्तै सोही वडाको गोगनपानीका ५२ वर्षीय जितबहादुर विक, भानाकोटका ३२ वर्षीय रुपलाल विक, ३२ वर्षीया अनिषा विक तथा उनकी ३ वर्षीया छोरी करिश्मा विक पनि दुर्घटनामा परेका छन्।

उद्धार गरिएका सबै घाइतेहरूलाई तत्कालै एम्बुलेन्समार्फत थप उपचारका लागि धनगढीस्थित सेती प्रादेशिक अस्पताल पठाइएको छ। हाल अस्पतालमा उनीहरूको उपचार जारी रहेको छ भने दुर्घटनाको वास्तविक कारणबारे प्रहरीले थप अनुसन्धान गरिरहेको छ।

प्रकाशित मिति: मंगलबार, असोज २०, २०८३

प्रतिक्रिया दिनुहोस्