डडेल्धुराको खानेपानी कार्यालयभित्रै इन्जिनियर र लेखापालबीच कुटाकुट, दुवै घाइते

समाज

गृहपृष्ठ
समाज
डडेल्धुराको खानेपानी कार्यालयभित्रै इन्जिनियर र लेखापालबीच कुटाकुट, दुवै घाइते

डडेल्धुराको खानेपानी कार्यालयभित्रै इन्जिनियर र लेखापालबीच कुटाकुट, दुवै घाइते

शुक्रबार, असोज १६, २०८३ चेतना खबर

डडेल्धुरा : खानेपानी तथा ढल व्यवस्थापन कार्यालय डडेल्धुरामा कार्यरत इन्जिनियर र लेखापालबीच कार्यालयभित्रै हातपात भएको छ। शुक्रबार साँझ कार्यकक्षमै भएको विवाद उग्र बन्दा इन्जिनियर मनोजकुमार दास र लेखा प्रमुख (लेखापाल) राजेन्द्रबहादुर थापाबीच कुटाकुट भएको हो।

घटनामा दुवै जना घाइते भएका छन्। उनीहरूको हातमा चोटपटक लागेको र हाल डडेल्धुरा अस्पतालमा उपचार भइरहेको जिल्ला प्रहरी कार्यालय डडेल्धुराले जनाएको छ।

जिल्ला प्रहरी कार्यालय डडेल्धुराका सूचना अधिकारी अर्जुन सेठीका अनुसार भ्रमण तथा दैनिक भत्ता (टीए/डीए) सम्बन्धी विषयलाई लिएर दुई कर्मचारीबीच विवाद सुरु भएको थियो। विवाद बढ्दै जाँदा दुवै पक्षबीच हातपात भएको हो।

अस्पतालको बेडबाट घटनाबारे जानकारी दिँदै घाइते लेखापाल राजेन्द्रबहादुर थापाले साँझ करिब पौने ५ बजे आफू कार्यकक्षमा करार कर्मचारीहरूको सम्झौता नवीकरणसम्बन्धी काम गरिरहेको बेला इन्जिनियर दास एक्कासी प्रवेश गरेर विवाद झिकेको बताएका छन्। थापाका अनुसार दासले ‘मलाई किन पेल्नुहुन्छ, भत्ता किन ढिलो दिनुभयो?’ भन्दै टेबलमा हिर्काएका थिए।

त्यसलगत्तै इन्जिनियर दासले कोठाको ताल्चा फोडेको र दराजको चाबी लुकाएको आरोप लगाउँदै टेबलमा रहेको सिसाको गिलास प्रहार गरेको थापाको दाबी छ। गिलासको प्रहारबाट आफ्नो हातमा गम्भीर चोट लागेको उनले बताएका छन्।

घाइते दुवै जनाको डडेल्धुरा अस्पतालमा उपचार भइरहेको छ भने दुवै पक्षले घटनाबारे प्रहरीमा उजुरी दिने तयारी गरेका छन्। प्रहरीले घटनाको थप अनुसन्धान भइरहेको जनाएको छ।

प्रकाशित मिति: शुक्रबार, असोज १६, २०८३

प्रतिक्रिया दिनुहोस्