डडेल्धुरा - डडेलधुरा जिल्लाको आलिताल गाउँपालिका वडा नम्बर ७, दुधेखाली गाउँमा बस्ने टेक बहादुर घर्तीको परिवार लामो समयदेखि गरिबी र ऋणको मारमा थियो। घरखर्च चलाउन र लिएको ऋण तिर्न अरू कुनै उपाय नभएपछि उहाँका तीनै जना छोराहरू—दिपक, राजेश र किरनले टाढा गएर मजदुरी गर्ने निधो गरे।
गाउँघरमा राम्रो कमाइ नहुने भएपछि धेरै पैसा कमाएर घरको दुःख हटाउने सपना बोकेर तीनै दाजुभाइ रसुवाको लाङटाङ हाइड्रोपावरमा काम गर्न पुगेका थिए। छोराहरूले उताबाट फोन गर्दा "बुवा, अब केही महिनामा ऋण सकिन्छ, त्यसपछि हामी घर फर्किन्छौँ" भन्थे, जसले गर्दा बुढाबुढीको मनमा ठूलो ढाडस मिलेको थियो। तर, केही दिनअघि रसुवाको त्यो खोलामा अचानक भीषण बाढी र पहिरो आयो।
बाढीले जलविद्युत् आयोजना आसपासका सडक, बिजुली र फोनका टावरहरू सबै बगाएर बाटोघाटो ठप्प बनाइदियो। त्यो प्रलयकारी घटना घटेको दिनदेखि नै तीनै दाजुभाइ परिवारसँग पूरै सम्पर्कविहीन बनेका छन्। उताबाट कुनै फोन आएको छैन, न त उनीहरूको अवस्था कस्तो छ भन्ने नै कुनै जानकारी पाउन सकिएको छ। गाउँमा बाढीको खबर फैलिएदेखि नै घर्ती परिवारको घरमा रुवाबासी सुरु भएको छ र दुधेखाली गाउँ नै शोकमा डुबेको छ।
घरमा तीनै भाइका साना-साना ५ जना छोराछोरी छन्, जो अझै दूधे बालक नै छन्। उनीहरूलाई देशमा के भयो र आफ्ना बाबुहरू कुन विपत्तिमा परेका छन् भन्ने केही थाहा छैन। तर, तीमध्ये अलि ठूलो भएको एउटा बालक भने दिनभर घरको आँगन र तेर्सो बाटोतिर हेरिरहन्छ। गाउँमा कोही नयाँ मान्छे आउँदा ऊ "मेरो बाबा आउनुभयो कि" भन्दै दौडिन्छ र बुवाआमासँग "बाबा कहिले आउनुहुन्छ?" भनेर सोधिरहन्छ। त्यो अबोध नातिको कुरा सुन्दा घरको डिलमा बसेका हजुरबुवा र हजुरआमाको मुटु भक्कानिएर आउँछ।
छोराहरूको कुनै अत्तोपत्तो नपाएपछि आमाको आँसु थामिएको छैन। उनी छाती पिट्दै रुन्छिन् र भन्छिन्— "मैले त नजानु भनेकै थिएँ बाबुहरूलाई त्यो उर्लँदो खोलाको छेउमा काम गर्न... तर ऋणको बाध्यताले गर्दा गए, अहिले यस्तो भयो।" यता बुवा टेक बहादुर पनि छोराहरूको चिन्ताले रातभर निदाउन सक्नुभएको छैन। घरमा बसेर रुनुभन्दा आफैँ गएर खोजी गर्ने आँट उहाँले जुटाउँदै हुनुहुन्छ। खल्तीमा धेरै पैसा नभए पनि र बाटो जतिसुकै कठिन भए पनि उहाँ भोलि जसरी भए पनि काठमाडौँ हुँदै रसुवा पुग्ने तयारीमा हुनुहुन्छ।
तीनै छोराहरू बाढीबाट जोगिएर कतै ओत लागेर बसेका होलान् र फेला पर्नेछन् भन्ने बलियो आशा मनमा लिएर उहाँ छोराहरूको खोजीमा निस्कन लाग्नुभएको हो।
