आलितालमा शैक्षिक विकाससँगै धर्म जागरणका लागि महाआरती महोत्सव हुँदै

धर्म संस्कृति

गृहपृष्ठ
धर्म संस्कृति
आलितालमा शैक्षिक विकाससँगै धर्म जागरणका लागि महाआरती महोत्सव हुँदै

आलितालमा शैक्षिक विकाससँगै धर्म जागरणका लागि महाआरती महोत्सव हुँदै

शुक्रबार, साउन २९, २०८३ चेतना खबर

डेल्धुरा: डडेल्धुराको आलिताल गाउँपालिका–४, भिमनगरस्थित श्री कृष्ण कालिका माध्यमिक विद्यालयको प्राङ्गणमा "आलिताल भिमनगर शृङ्गारिक महाआरती धर्म जागरण सप्ताह महा महोत्सव–२०८३" आयोजना हुने भएको छ।

विद्यालयमा छात्रावास निर्माण तथा बस खरिदका लागि आर्थिक सहयोग जुटाउने उद्देश्यले यहीँ श्रावण ३० गतेदेखि भाद्र ५ गतेसम्म उक्त महामहोत्सव आयोजना गर्न लागिएको हो।

मूल आयोजक समारोह समितिका अनुसार श्रावण ३० गते बिहान १० बजे शोभा कलश यात्रा र दिउँसो १ बजे महोत्सवको औपचारिक उद्घाटन गरिनेछ। महोत्सव अवधिभर दैनिक बिहान ११ बजेदेखि दिउँसो ३ बजेसम्म प्रवचन, भजन-कीर्तन तथा झाँकी प्रदर्शन, साँझ ७ बजेदेखि ८ बजेसम्म भारतको काशी विश्वनाथ तथा नेपालको पशुपतिनाथमा हुने जस्तै प्रसिद्ध शृङ्गारिक महाआरती र राति ८ बजेदेखि १० बजेसम्म धार्मिक प्रवचन तथा सांस्कृतिक कार्यक्रमहरू सञ्चालन हुनेछन्।

समारोहमा कथावाचक आचार्य सन्तोष अधिकारी मुख्य वाचक रहने यस महामहोत्सवमा राष्ट्रिय कलाकारहरूद्वारा भजन-कीर्तन, बाल संस्कार र जनजागरणमूलक कार्यक्रमहरू प्रस्तुत गरिनेछ।

आयोजक समितिले सुसंस्कृत समाज निर्माणका साथै शैक्षिक विकासका लागि सञ्चालित यस पुनित कार्यमा उपस्थित भई महाआरती दर्शन र अमृतमय प्रवचन श्रवण गर्न सम्पूर्ण धर्मानुरागी भक्तजनहरूलाई हार्दिक निमन्त्रणा गरेको छ।

प्रकाशित मिति: शुक्रबार, साउन २९, २०८३

प्रतिक्रिया दिनुहोस्