बझाङदेखि बनलेकसम्म ६० किलोमिटर लामो प्रसारण लाइन बन्ने

समाज

गृहपृष्ठ
समाज
बझाङदेखि बनलेकसम्म ६० किलोमिटर लामो प्रसारण लाइन बन्ने

बझाङदेखि बनलेकसम्म ६० किलोमिटर लामो प्रसारण लाइन बन्ने

बिहीबार, साउन २१, २०८३ चेतना खबर

सुदुरपश्चिममा विद्युत् प्रसारण पूर्वाधार विस्तार गर्ने लक्ष्यसहित बझाङ–बनलेक (पश्चिम सेती) ४०० केभी प्रसारण लाइन निर्माणको प्रक्रिया अघि बढाइएको छ। करिब २,५०० मेगावाट विद्युत् प्रवाह गर्न सक्ने क्षमताको यो आयोजना निर्माणका लागि राष्ट्रिय प्रसारण ग्रिड कम्पनी लिमिटेडले विद्युत् विकास विभागमा अनुमति माग्दै आवेदन दर्ता गरेको हो।

प्रस्तावित ६० किलोमिटर लामो प्रसारण लाइन बझाङको जयपृथ्वी नगरपालिका–१ स्थित प्रस्तावित चैनपुर सबस्टेसनदेखि डोटीको शिखर नगरपालिका–१० मा निर्माण हुने बनलेक (पश्चिम सेती) सबस्टेसनसम्म विस्तार हुनेछ। आयोजनाअन्तर्गत चैनपुरमा ४००/१३२ केभी, १६० एमभिए क्षमताको र बनलेकमा ४००/१३२ केभी, ३१५ एमभिए क्षमताको सबस्टेसन निर्माण गरिनेछ।

प्रसारण लाइनमा १४३ वटा डबल सर्किट टावर रहनेछन्। टावरको अधिकतम उचाइ ६१ मिटर हुने र टावरहरूबीचको औसत दूरी करिब ४०९ मिटर रहने प्रस्ताव छ। लाइनको क्षेत्राधिकार ४६ मिटर निर्धारण गरिएको छ।

आयोजनाका लागि करिब २९५.४२ हेक्टर जमिन आवश्यक पर्नेछ। यसमध्ये ३०.४१ हेक्टर टावर निर्माणका लागि र बाँकी २६५ हेक्टर विद्युत् मार्गका रूपमा प्रयोग हुनेछ। सबस्टेसन निर्माणका लागि छुट्टै २१.४१ हेक्टर जग्गा आवश्यक पर्ने जनाइएको छ।

निर्माण कार्य पाँच वर्षभित्र सम्पन्न गर्ने लक्ष्य राखिएको यस आयोजनामा वातावरणीय प्रभाव न्यून हुने गरी काम गरिने बताइएको छ। साथै, आयोजनासम्बन्धी सुझाव र राय उपलब्ध गराउन विद्युत् विकास विभागले सरोकारवाला तथा सर्वसाधारणलाई सार्वजनिक सूचनामार्फत आग्रह गरेको छ।

प्रकाशित मिति: बिहीबार, साउन २१, २०८३

प्रतिक्रिया दिनुहोस्