डडेल्धुरा भातकाँडाका युवाको सामूहिक कृषि : स्वदेशमै आत्मनिर्भर

समाज

गृहपृष्ठ
समाज
डडेल्धुरा भातकाँडाका युवाको सामूहिक कृषि : स्वदेशमै आत्मनिर्भर

डडेल्धुरा भातकाँडाका युवाको सामूहिक कृषि : स्वदेशमै आत्मनिर्भर

आइतबार, भदौ ८, २०८२ भीम दाहाल

डडेल्धुरा – डडेल्धुरा जिल्लाको गन्यापधुरा गाउँपालिका–१ भातकाँडामा दुई युवाले वैदेशिक रोजगारी छाडेर गाउँमै सामूहिक कृषि पेशा सुरु गरेका छन्। स्वदेशमै केही गर्नुपर्छ भन्ने सोच लिएर मलेसियाबाट फर्किएका हिरा भण्डारी र ललित महताले अहिले सामूहिक लगानीमा तरकारी खेती गर्दै आत्मनिर्भर बन्न सकिन्छ भन्ने उदाहरण प्रस्तुत गरेका हुन्।

७० हजार रुपैयाँ वार्षिक रुपमा भाडा दिनेगरी २६ रोपनी जमिन लिजमा लिएर उनीहरूले मौसमी तथा बेमौसमी तरकारी खेती थालेका छन्। "गाउँमै केही गर्नुपर्छ भन्ने सोचले हामीले वैदेशिक रोजगारी छाडेर कृषि रोज्यौं," कृषक हिरा भण्डारीले बताए।

कृषि ज्ञान केन्द्र डडेल्धुराबाट २ लाख ६० हजार रुपैयाँ अनुदान र करिब ५ लाख रुपैयाँ आफ्नै लगानीमा उनीहरूले हाल १० वटा टनेलमा सिम्ला, टमाटर, च्याउ र अकबरे खुर्सानीको खेती गरिरहेका छन्। यसपटक थप १० वटा टनेल विस्तार गर्ने योजना बनाइएको छ।

अहिले २१ सय बोट सिम्ला रोपिएको छ। "८५ क्विन्टल सिम्ला बिक्री भइसकेको छ, बाँकी मंसिरसम्म फल्छ," भण्डारीले जानकारी दिए। उनका अनुसार एक बोटबाट करिब ५ किलोसम्म उत्पादन हुने गरेको छ र यस सिजनमा सिम्लाबाट मात्र करिब १३ लाख रुपैयाँ आम्दानी गर्ने योजना रहेको छ।

तरकारी उत्पादनमा उनीहरूले जैविक विधि अपनाएका छन्। "साहुखर्कबाट प्रांगारिक मल ट्र्याक्टरमा ल्याएर प्रयोग गर्छौं, प्रती ट्रली करिब ६ हजार रुपैयाँ खर्च पर्छ," भण्डारीले भने। उनले रसायनिक विषादी र रासायनिक मल पनि प्रयोग नगर्ने गरेको बताए।

उत्पादन भएको तरकारी दिपायल र अत्तरियामा बिक्री हुने गरेको छ। "व्यापारीहरू आफैं हाम्रो घरमै आइपुग्छन्," भण्डारीको भनाइ छ।

तर,उनले सरकारी अनुदान वितरण प्रक्रियाप्रति गुनासो गरेका छन्। "काम गर्ने किसानभन्दा पहुँच भएका मान्छेले मात्रै सुविधा पाउँछन्। वास्तविक किसान उल्टै पेलिन्छ," कृषक भण्डारीले दुखेसो पोख्दै भने। अहिले त्यसो नभएको र बिगतमा भने अनुदानमा निक्कै पहुँचपावर लाग्ने गरेको गुनासो सुनाए ।

विदेशमा पसिना बगाएर फर्किएका यी दुई युवाले गाउँमै आधुनिक तरकारी खेती सुरु गरेर आत्मनिर्भरता र उद्यमशीलताको उदाहरण देखाएका छन्। उनीहरूको सफलताले गाउँका अन्य युवालाई पनि कृषि व्यवसायतर्फ आकर्षित गर्ने अपेक्षा गरिएको छ।

प्रकाशित मिति: आइतबार, भदौ ८, २०८२

प्रतिक्रिया दिनुहोस्