रातो गुराँस रिसोर्टद्वारा सडक दुर्घटना न्यूनीकरण अभियान सुरु

समाज

गृहपृष्ठ
समाज
रातो गुराँस रिसोर्टद्वारा सडक दुर्घटना न्यूनीकरण अभियान सुरु

रातो गुराँस रिसोर्टद्वारा सडक दुर्घटना न्यूनीकरण अभियान सुरु

आइतबार, फागुन १०, २०८२ चेतना खबर

डडेल्धुरा:स्थानीय विकास र सामाजिक उत्तरदायित्वलाई आत्मसात गर्दै रातो गुराँस रिसोर्ट एण्ड ट्रेनिङ सेन्टर प्रा.ली, डडेल्धुराले सडक दुर्घटनालाई न्यूनीकरण गर्ने अभियानको सुरुवात गरेको छ। रिसोर्टका मेनेजर चन्द्र प्रकाश ओलीको नेतृत्वमा रिसोर्टमा कार्यरत कर्मचारीहरूले आइतबारदेखि सडकका खाल्डाखुल्डी पुर्ने कार्य थालेका हुन्।

रिसोर्ट व्यवस्थापनका अनुसार यो अभियान सामाजिक उत्तरदायित्व (CSR) अन्तर्गत सञ्चालन गरिएको हो। यस क्रममा प्रत्येक साताको एक दिन श्रमदान गर्दै सडकका खाल्डाखुल्डी पुर्ने, सडक सरसफाइ गर्ने, नाली खोल्ने तथा सडक दुर्घटना न्यूनीकरणमा सहयोग पुग्ने विभिन्न कामहरू निरन्तर रूपमा गरिनेछ।

मेनेजर ओलीले सार्वजनिक संरचनाको संरक्षण केवल सरकारी निकायको जिम्मेवारी मात्र नभई निजी क्षेत्र र समुदायको साझा दायित्व भएको बताए। “हामीले सुरु गरेको यो प्रयासले यात्रु र स्थानीयवासीको दैनिक आवतजावत सहज बनाउने मात्र होइन, दुर्घटनाको जोखिम घटाउन पनि मद्दत गर्नेछ,” उनले भने।

स्थानीयवासीहरूले निजी क्षेत्रबाट आएको यस किसिमको पहलको स्वागत गर्दै अन्य संघ–संस्था र व्यवसायिक प्रतिष्ठानलाई पनि यस्तै सामाजिक कार्यमा जोडिन आग्रह गरेका छन्। समुदाय र निजी क्षेत्रको सहकार्यले डडेल्धुराका सडकहरू सुरक्षित, सफा र व्यवस्थित बनाउने अपेक्षा गरिएको छ।

प्रकाशित मिति: आइतबार, फागुन १०, २०८२

प्रतिक्रिया दिनुहोस्